Draftohen Kodi Etik dhe rregulloret për Prokurorin, Këshillin Etik dhe Gjyqin e Nderit të OIK
OIK, harton draft aktet e Kodit Etik, Rregulloret për përcaktimin e fushëveprimit të organeve etike (Prokurorit, Këshillit Etik dhe Gjyqit të Nderit) në procedurat për përcaktimin e llojit të shkeljeve etike dhe procedurat e mbikëqyrjes etike dhe profesionale.
Prishtinë, 13 dhjetor –
Oda Infermierëve, mamive dhe profesionistëve tjerë shëndetësor, e përkrahur nga HIS (Integral Health Service), ka realizuar punëtorinë e radhës që kishte për qëllim finalizimin e Draft Kodit Etik, dhe draft rregulloreve për përcaktimin e fushëveprimit të rolit të Prokurorit, Këshillit Etik dhe Gjyqit të Nderit të OIK.
Kryetarja e OIK, Nexhmije Gori, duke theksuar rëndësinë e jashtëzakonshme të kodit etik, si dispozitë gjithëpërfshirëse dhe përcaktues të sjelljes së profesionistëve shëndetësorë, kërkoi nga kontribuuesit një përkushtim të veçantë në këtë pjesë, si edhe një diskutim me bazën deleguese për inkuadrim dhe përfshirje të gjithanshme të anëtarëve të OIK në këtë proces.
Hysni Bajrami, Këshilltar Ligjor i OIK, theksoi se Kodi Etik është i një rëndësie të veçantë për komunitetin e anëtarëve të OIK dhe paraqet aktin kryesor të OIK pas statutit të saj, Me këtë, implikohen përcaktime që përshijnë të gjithë anëtarët. Prandaj, ai kërkoi që procesi i hartimit të këtyre akteve ti nënshtrohet një debati të gjerë publik me palët e interesit, shoqatat dhe veçanarëisht me anëtarët e saj, për të siguruar një proces maksimal transparent, demokratik dhe me gjithpërfshirje të anëtarëve të saj. Kjo, sepse ata do të jenë zbatues të këtyre parimeve.
Në anën tjetër, Prokurorja e OIK, Dafina Kulinxha, Kryetarja e Këshillit Etik Behare Alija dhe Kryetari i Gjyqit të Nderit Mexhit Mustafa paraqitën përvojën dhe praktikën e deritanishme të këtyre organeve në proceset e mbikqyrjes etike, duke kërkuar që mësimet e marra nga përvoja e këtyre viteve të përfshihen brenda akteve.
OIK me qëllim të transparencës së plotë me anëtarët e saj, draftet e finalizuara do t’i paraqesë në konsultim publik, për çka inkurajon të gjithë anëtarët e saj, të paraqesin komentet dhe sugjerimet rreth përmbajtjes së këtyre akteve.
