OIK mbajti Kuvendin e IV të Legjislaturës së III-të
Prishtinë, 23 shkurt –
Oda e infermierëve, mamive dhe profesionistëve tjerë shëndetësor ka mbajtur Kuvendin e IV të legjislaturës së III-të.
Punimet e Kuvendit i hapi kryetarja e OIK, znj. Nexhmije Gori, e cila i ka përshëndetur të pranishmit dhe i ka falëmnderuar për punën dhe angazhimin e tyre në zhvillimin dhe avansimin e OIK-ut.
Kryetarja Gori në kuadër të raportimit të saj para Kuvendit, ka folur për aktivitetet e zhvilluara gjatë vitit 2023, përfshirë edukimin e vazhdueshëm, takimet regjionale, menaxhimin e Fondit të Solidaritetit si dhe menaxhimin financiar brenda OIK.
Profesor Hysni Bajrami, këshilltar në OIK ka thënë se OIK është shtëpi e të gjithë komunitetit infermieror. “Ne kemi një ligj të avansuar sikurse edhe sistemin zgjedhor, kështuqë po krijojmë edhe mekanizma statutorë duke ndryshuar disa nga rregullat, përfshirë ato për licencim dhe ri-licencim.
Profesor Bajrami po ashtu ka thënë se po rritet çdo ditë llogaridhënia kundrejt përgjegjësisë, duke ngritur kështu një demokraci të brendshme.
Në kuadër të ndryshimeve profesor Bajrami ka paralajmëruar kod të ri etik që do të jetë shumë më specifik për infermierinë.
Ndërkohë, kryetarja e OIK Nexhmije Gori i është përgjigjur shumë pyetjeve të anëtarëve të Kuvendit gjatë raportimit të saj. Në fjalën e saj ka folur në detaje edhe për njërën nga brengat kryesore – largimin e stafit infermieror nga Kosova.
“Edhe gjatë vitit 2023 shqetësim kryesor i yni ishte rritja e kërkesave për largimin e anëtarëve tanë nga Kosova, ku sfida më e madhe mbetet ikja e profesionistëve me përvojë të madhe nga institucionet publike. Në vitin raportues janë lëshuar 116 vërtetime të Kodit Etik si dhe kanë qenë 713 kërkesa për licencë të pa plastifikuar të cilat kërkohen nga ambasadat.
Me qëllim të realizimit të kërkesave të anëtarëve tanë dhe ngritjes së cilësisë së shërbimeve për pacientë në vazhdimësi kemi adresuar kërkesa për Ministrinë e Shëndetësisë, SHSKUK dhe institucionet tjera relevante për përmirësimin e kushteve të punës, rritjen e pagave dhe kompenzimeve për punën e natës, kujdestarive, festave zyrtare si dhe shtimin e numrit të infermierëve, mamive dhe profesionistëve tjerë shëndetësorë në tri nivelet e sistemit shëndetësor”, ka thënë kryetarja Gori.
Sipas saj, nga data 14 deri me datë 23 nëntor 2023 janë mbajtur aktivitetet e Edukimit të Vazhdueshëm Profesional të profilzuar me pjesëmarrje të 6207 profesionistëve shëndetësorë përmes platformës online, aktivitete këto në kuadër të Edukimit të Vazhdueshëm Profesional (EVP).
Po ashtu para anëtarëve të Kuvendit ka raportuar edhe Kryetari i Këshillit Mbikqyrës, z Musa Baftiu, i cili ka folur rreth mbikqyrjes së aktiviteteve që janë zhvilluar gjatë vitit 2023, me theks të veçantë afarizmin finaciar të OIK dhe punën e komisioneve.
Në këtë Kuvend u shqyrtuan dhe me shumicën e votave u miratuan:
- Raporti i punës së OIK-ut për vitin 2023
- Plani i punës për vitin 2024
- Raporti financiar për vitin 2023
- Rregullorja për Edukimin e Vazhdueshëm Profesional.
