OIK përmbyll sesionin vjeshtor të Edukimit të Vazhdueshëm Profesional
Oda e Infermierëve, Mamive dhe Profesionistëve tjerë Shëndetësorë të Kosovës (OIK) në kuadër të sesionit vjeshtor ka vazhduar Edukimin e Vazhdueshëm Profesional (EVP) pa pagesë për të gjithë anëtarët në qytetin e Podujevës dhe Vushtrrisë. Me këtë rast edhe është përmbyllur cikli vjeshtor i EVP-së
Prishtinë, 14 dhjetor –
Oda e Infermierëve, Mamive dhe Profesionistëve tjerë Shëndetësorë të Kosovës (OIK) ka organizuar në qytetin e Podujevës dhe Vushtrrisë sesionin vjeshtor të Edukimit të Vazhdueshëm Profesional (EVP).
Edhe në këto qytete janë diskutuar tri tema mjaft të rëndësishme për komunitetin në kuadër avancimit profesional:
- Legjislacioni, Etika dhe Standardet Profesionale ku potencohet rëndësia e kuadrit ligjor, çështjeve etike, dhe mbajtjes së standardeve profesionale në praktikën e përditshme.
- Ndikimi i Komunikimit dhe Bashkëpunimi, duke potencuar rëndësinë e komunikimit të qartë dhe bashkëpunimit ndërdisiplinor në mes të profesionistëve për përmirësimin e cilësisë së kujdesit shëndetësorë si dhe
- Mbingarkesa në Punë dhe Menaxhimi i Shëndetit dhe Sigurisë që ka në fokus menaxhimin e stresit, mbrojtjen e shëndetit mendor dhe sigurinë në vendin e punës për profesionistët shëndetësorë.
Pjesmarrja ishte jashtëzakonisht e lartë, e ku të pranishmëve iu drejtuan Kryetarja e Odës së Infermierëve, Mamive dhe Profesionistëve tjerë Shëndetësorë të Kosovës, kryetari i KD të OIK z. Bashkim Mehmeti dhe zytarë të lartë të OIK dhe anëtarë të KD të OIK.
Kryetarja Gori ka njoftuar komunitetin për punën që është bërë në draftimin e Kodit Etik si dhe rregulloreve për Prokurorin, Këshillin Etik si dhe Gjyqin e Nderit të OIK.
Gori në kuadër të EVP-së ka porositur infermierët, mamitë dhe profesionistët tjerë shëndetësorë që të respektojnë ligjet dhe rregullat etike, në theks të veçantë në vazhdimësi të ruajnë një nivel të lartë të komunikimit me pacientët.
Ligjëratat në Podujevë dhe Vushtrri kanë përmbyllur sesionin vjeshtor të Edukimit të Vazhdueshëm Profesional të organizuar nga Oda e Infermierëve, Mamive dhe Profesionistëve tjerë Shëndetësorë.
