OIK vazhdon me sesionet e Edukimit të Vazhdueshëm Profesional në regjionin e Ferizajit
OIK vazhdon me sesionet e Edukimit të Vazhdueshëm Profesional në regjionin e Ferizajit
Prishtinë, 9 nëntor –
Në vazhdën e angazhimeve të saj për zhvillimin profesional të infermierëve dhe profesionistëve shëndetësorë, Oda e Infermierëve, Mamive dhe Profesionistëve të tjerë Shëndetësorë të Kosovës (OIK) organizoi sesionin e radhës të Edukimit të Vazhdueshëm Profesional (EVP) në regjionin e Ferizajit. Të gjithë anëtarët e këtij regjioni përfituan nga mundësia për të ndjekur trajnimet pa pagesë, duke e bërë pjesëmarrjen jashtëzakonisht të lartë dhe mbështetjen të dukshme për këtë nismë.
Këtij aktiviteti iu bashkëngjitën Zv. Kryetari i OIK, z. Xhemajl Dugolli, dhe ish-Kryetari i OIK, z. Naser Rrustemaj, të cilët theksuan rëndësinë e përpjekjeve për avancimin profesional të infermierëve në çdo regjion të Kosovës. Në emër të OIK-së, ata ndanë falënderim të veçantë dhe mirënjohje për Universitetin e Shkencave të Aplikuara të Ferizajit (USHAF), i cili ka ofruar në mënyrë të vazhdueshme mbështetje në shfrytëzimin e sallave për organizimin e këtyre aktiviteteve.
Në kuadër të këtij sesioni, pjesëmarrësit patën mundësinë të thellojnë njohuritë në disa tema kyçe për profesionin dhe përmbushjen e standardeve të larta profesionale, përfshirë:
- Legjislacioni, Etika dhe Standardet Profesionale – një diskutim i detajuar mbi rëndësinë e njohjes së kuadrit ligjor dhe zbatimin e standardeve profesionale në çdo aspekt të praktikës.
- Komunikimi dhe Bashkëpunimi Ndërdisiplinor – me theks në nevojën e një komunikimi të qartë dhe bashkëpunimi të ngushtë ndërmjet profesionistëve shëndetësorë për përmirësimin e cilësisë së shërbimeve dhe kujdesit të pacientit.
- Mbingarkesa në Punë dhe Menaxhimi i Shëndetit dhe Sigurisë – trajtesë mbi teknikat për menaxhimin e stresit dhe krijimin e kushteve të sigurta në punë për mbrojtjen e shëndetit mendor dhe fizik të profesionistëve shëndetësorë.
Ky sesion, me një interes dhe angazhim të madh nga ana e pjesëmarrësve, pasqyron dedikimin e OIK-së për të mbështetur zhvillimin e vazhdueshëm të anëtarëve të saj në të gjitha regjionet e vendit dhe për të garantuar një shërbim të standardeve më të larta për të gjithë qytetarët e Kosovës.
