Mbyllen punimet e konferencës “Nderojmë të kaluarën, ndërtojmë të ardhmen”
Megjithëse në kushte të vështira atmosferike, shumë infermierë, anëtarë të Odës së Infermierëve të Kosovës, nuk kanë hezituar që të dielën të ngjiten tek shpella në malet e fshatit Llanishtë që ishte improvizuar si spital për Zonën e Nerodimes
Prishtinë, 05 maj –
Konferenca “Nderojmë të kaluarën – Ndërtojmë të ardhmen”, ka përmbyllur punimet me një vizitë në ish spitalin e improvizuar të luftës, në një shpellë në malet e fshatit Llanishtë, në Zonën Operative të Nerodimes.
Sikurse edhe gjatë lutës, një performancë koreografike ka kthyer për 20 vite në kohë, të gjithë të pranishmit, që në kushte të vështira arritën të ngjiten në shpellën që ishte spital lufte dhe ku ishin strehuar mbi njëqind të plagosur.
Vizita në shpellë i ka paraprirë një kampingu të infermierëve, pasi u referuar tema me rëndësi për infermierinë gjatë luftës. Gjatë kampingut, anëtarët e Odës së Infermierëve janë vizituar nga i Kryetari i Komunës së Shtimes, Naim Ismajli.
Ndërkohë, deputetja Time Kadriaj, anëtare e Komisionit Parlamentar për Shëndetësi dhe ish mjeke e UÇK-së, ka përshëndetur gjatë ditës së dytë të pranishmit në konferencë.
“Është privilegj për mua të jem këtu. Ne asnjëherë nuk duhet të harrojmë të kaluarën. Andaj edhe po më pëlqen kjo moto: ‘Nderojmë të kaluarën, ndërtojmë të ardhmen’, ka thënë deputetja Kadriaj.
Konferenca ka zgjatur dy ditë dhe në të janë referuar tema shumë të rëndësishme për zhvillimin infermieror dhe në të kanë marrë pjesë personalitete të rëndësishme të jetës politike, shoqërore dhe punonjës të shumtë shëndetësorë.
