Mbahet Kuvendi i -VI- i OIK i legjislaturës së II-të
Oda e infermierëve, mamive dhe profesionistëve tjerë shëndetësorë ka mbajtur Kuvendin e VI të legjislaturës së dytë, me prezencë fizike dhe online për gjithë anëtarët e Kuvendit.
Prishtinë, 26 shkurt –
Kryetari i Odës së infermierëve, mamive dhe profesionistëve tjerë shëndetësorë Naser Rrustemaj në Kuvendin e VI-të, të legjislaturës së dytë të OIK, ka raportuar për punën e OIK gjatë vitit 2021. Ai ka folur në detaje për gjitha angazhimet e Odës gjatë këtij viti e që ishte manifestuar me pengesa shkaku i pandemisë Covid 19.
Kryetari Rrustemaj ka thënë se megjithatë ai dhe organet si dhe komisionet e OIK-ut janë angazhuar në avansimin dhe përparimin e mëtejmë të punës.
“Mund të vlerësoj se kemi pasur progres dhe në vazhdimësi të përmirësimit të aktiviteteve të OIK-ut. Edhe në vitin raportues si në vitin e kaluar jemi ballafaquar me problemin e pandemisë por aktivitetet e planifikuara në përgjithësi janë realizuar falë angazhimit të të gjitha organeve dhe komisioneve të OIK-ut”, ka thënë Rrustemaj.
Disa nga aktivitetet kryesore të planifikuara për vitin raportues, sipas kryetarit Rrustemaj janë: Draftimi i Projektligjit për profilet infermierore, Kongresi i parë Ndërkombëtar si dhe zhvillimi i aktiviteteve të Edukimit të Vazhdueshëm Profesional.
“Misioni jonë kryesor ka qenë prezantimi dhe përfaqësimi i intereave profesionale në të gjitha institucionet relevante me ç’rast kemi përfaqësuar me shumë dinjitet këtë mision duke prezantuar, përfaqësuar dhe mbrojtur interesat qoftë në procesin e Draftimit të Projektligjit për pagat e nëpunësve publik, dhe në hartimin e politikave tjera që kanë të bëjnë me avancimin professional”, ka thënë kryetari Rrustemaj, duke u shprehur i kënaqur me punën dhe angazhimin e anëtarësisë së OIK.
“Në kohën e pandemisë, ku është vënë në pah tërë rëndësia dhe vlera e infermierit dhe profesionistëve tjerë shëndetësor me ç’rast më duhet edhe një herë të shprehë keqardhjen dhe respektin për anëtarët e Odës që sot nuk janë në mesin tonë e për të cilët në shenjë mirënjohje është ngritur një monument përkujtimor (Obelisk)”, ka thënë kryetari Rrustemaj, duke potencuar se do të vazhdojnë dinjitetshëm t’i mbrojnë dhe prezentorjnë interesat profesionale të anëtarëve të OIK.
Zv. Kryetarja e OIK-ut, Lirije Beqiri ka thënë se për vitin raportues i tërë përkushtimi i saj ka qenë në gjetjen e zgjidhjeve që sigurojnë integritet personal dhe profesional të komunitetit infermieror. “Jam shumë e vetëdijshme që shumë nga këto probleme të akumuluara ndër vite bashkarisht i kemi zgjedhur, por ende na presin punë dhe angazhime në përmbushjen e misionit tone”, ka thënë Beqiri.
Edhe zv. kryetari i OIK, Xhemajl Dugolli në fokus të veçantë kanë pasur zhvillimin dhe avansimin e shërbimeve të OIK-ut dhe Edukimin e Vazhdueshëm Profesional.
Kryetari i Këshillit Drejtues të OIK, Muharrem Arifi ka thënë se në cilësinë e Kryetarit të Këshillit Drejtues, të organit më të lartë kolegjial menaxhues, mund të konstatohet se me sukses kanë kryer detyrat dhe përgjegjësitë që dalin nga Ligji për Odat e Profesionistëve Shëndetësorë.
“Këshilli Drejtues ka evidentuar të gjitha sfidat dhe çështjet me interes për OIK dhe anëtarët e saj dhe ka propozuar zgjedhje për rregullimin e çështjeve procedurale dhe juridike të evidentuara për të cilat është dashur të gjindet zgjedhje”, ka thënë Arifi.
Në Kuvendin e VI të OIK-ut, kanë raportuar edhe Musa Baftiu, Kryetar i Këshillit Mbikqyrës të OIK, Besnik Rrmoku, Kryetar i Këshillit Etik, Vjollca Xani Rama, zv.kryetare e gjyqit të nderit si dhe Dafina Vërbovci – Kulinxha, Prokurore e Odës së Infermierëve.
Po ashtu, në Kuvendin e VI-të është bërë plotësim ndryshimi i vendimit për pagesë të anëtarësisë për anëtarët e pa punë të OIK, draft rregullores së fondit të solidaritetit dhe ndihmës reciproke si dhe janë miratuar rregullorja për konfidencialitet e OIK dhe janë miratuar raporti dhe plani i punës për vitin 2022.
Deri më tani është paguar 60 euro anëtarësi për 5 vite nga të pa punët, (duke paguar anëtarësinë për çdo muaj nga një euro) dhe propozimi i miratuar është që tash e tutje kjo shumë të zbritet në 50 euro për pesë vite.
Mospagesa e anëtarësisë, sipas udhëheqësve të OIK, bie në kundërshtim me Ligjin për Odat e Profesionistëve Shëndetësorë, andaj për të mos ardhur tek revokimi i licencave është rishikuar edhe pagesa dhe mënyra e pagesës së saj.
