Reagim i KD të OIK lidhur me kompensimin e shtesave për rrezikshmëri për punonjësit shëndetësorë gjatë periudhës së pandemisë
Këshilli Drejtues (KD) i Odës së Infermierëve, Mamive dhe punonjësve tjerë shëndetësorë (OIK) në takimin e mbajtur sot më datën 30.10.2020, në një ndër pikat e rendit të ditës ka diskutuar lidhur me shqetësimet e shprehura të anëtarëve të OIK-ut, lidhur me marrëveshjen e lidhur mes Qeverisë dhe Federatës Sindikale të Shëndetësisë së Kosovës (FSSHK), me të cilën përcaktohet lartësia e shtesës së profesionistëve shëndetësorë gjatë kohës së pandemisë në emër të rrezikshmërisë në punë.
Me këtë rast, KD i OIK ka shprehur indinjatën e thellë lidhur me njoftimin e bërë publik nga ana e ministrit të shëndetësisë së Kosovës z. Armend Zemaj, të publikuar në rrjetin social “Facebook” më datën 29.10.2020, ku njoftohet për marrëveshjen e arritur mes Qeverisë dhe Federatën Sindikale të Shëndetësisë së Kosovës (FSSHK).
Në këtë njoftim, i bëhet me dije komunitetit mjekësor dhe opinionit publik në lidhje me përfitimet e shtesave të profesionistëve shëndetësorë deri në fund të këtij viti.
KD konsideron se me këtë rast, marëveshja e arritur mes këtyre palëve, është në kundërshtim me parimin e barazisë si e drejtë themelore dhe kushtetuese e njeriut.
Rrezikut ndaj infektimit nga virusi Covid 19, në mënyrë të barabartë i ekspozohen të gjithë profesionistët shëndetësorë. Andaj, është i papranueshëm dhe i padrejtë kategorizimi dhe diferencimi në lartësinë e kompensimit të shtesës.
Marrëveshja e fundit është cënim i dinjitetit dhe integritetit profesional dhe është në kundërshtim edhe me Deklaratën Universale të të Drejtave dhe Lirive Themelore të Njeriut, me Konventat Evropiane për të Drejtat e njeriut dhe kushtetutën e vendit, sepse kjo marrëveshje profesionistët shëndetësorë i vë në pozita të pa barabarta.
Kjo për faktin se infermierët janë edhe më të eskpozuar ndaj rrezikut, shkaku i kontakteve më të shpeshta që kanë me pacientët.
