OIK mbështet infermierët heronjë
Oda e Infermierëve, Mamive dhe Profesionistëve tjerë shëndetësorë të Kosovës, përmes një komunikate, ka kërkuar mbështetje për infermierët, mamitë dhe punonjësit tjerë shëndetësore, të cilët, janë heronjtë e vijës së parë të frontit, në luftimin e Corona Virusit, COVID-19.
Më poshtë mund të lexoni komunikatën e plotë të OIK-ut:
Shumë mesazhe prekëse kemi marrë gjithandej botës këtyre ditëve, nga ku infermierët rrëfejnë përvojat e tyre sa humane aq edhe të frikshme nga vija e parë e frontit në luftë me Corona Virus COVID-19.
Infermierët kosovarë nuk është hera e parë që shndërrohen në ushtarët e vijës së parë të frontit në luftë me të keqen. Ata ishin në ballë edhe të luftës së fundit, duke sakrifikuar shpesh veten, në të mirë të shëndetit të ushtarëve dhe popullatës civile në Kosovë.
Të radhitur në një profresion mjaft human, ata do të kenë në vazhdimësi mbështetjen e Odës së Infermierëve, Mamive dhe Profesionistëve tjerë shëndetësorë të Kosovës, për të sfiduar pandeminë e shpallur zyrtarisht nga Organizata Botërore e Shëndetësisë, e që ka shënuar edhe ndër ne rastet e para.
Oda e Infermierëve, konsideron se Qeveria duhet të rishqyrtoj mundësinë që në rastet kur çiftet e punësuar në sistem shëndetësorë të jenë nga profile infermierore, njëri të jenë të liruar nga puna, sidomos tek çiftet kur u kërkohet kujdes për fëmijët.
Po ashtu, kërkojmë që në çdo çast nga Ministria e Shëndetësisë dhe gjithë menaxhmentet e institucioneve shëndetësore, të ofrojnë mbështetje me materiale shpenzuese, dezinfektues dhe maska mbrojtëse për gjithë stafin infermierorë pa përjashtim, në mënyrë që ata që punojnë me pacientë të kenë mbrojtje maksimale.
Nuk do të donim të bëheshim subjekt i lajmeve, kur për shkak të mungesës së pajisjeve adekuate, infermierët apo punonjësit tjerë shëndetësorë të jenë prekur nga pandemia.
Për këtë, apelojmë tek gjithë mekanizmat qeveritarë që të ofrojnë mbështetje maksimale në mënyrë që mbrojtja shëndetësore e infermierëve të mos mungojë dhe situata vetëm kështu do të jetë nën kontroll.
Po ashtu, apelojmë tek qytetarët, që të mirëkuptojnë rolin, rëndësinë dhe angazhimin e infermierëve, në këto rrethana kur ata kanë lënë anash shtëpitë, familjet dhe sigurinë e tyre, për të qenë afër shëndetit Tuaj.
Po ashtu, kërkojmë nga gjithë kolegët, të jenë sa më syçelë, që gjatë ofrimit të shërbimeve shëndetësore, të mos neglizhojnë as edhe një herë respektimin e masave mbrojtëse, pasi me këtë, përveç që ndikojnë në luftimin e COVIT 19, do të ruajnë edhe shëndetin e tyre dhe familjarëve të tyre.
Shumë fat!
Oda e Infermierëve, Mamive dhe profesionistëve tjerë shëndetësorë të Kosovës
