OIK mbështetë manualin e dytë për procedurat standarde operative
Prishtinë, 21 nëntor –
Përfaqësues së Odës së infermierëve, mamive dhe profesionistëve tjerë shëndetësorë kanë marrë pjesë në promovimin e manualit të dytë për procedurat standarde operative.
Kryetarja e OIK, Nexhmije Gori ka uruar zyrtarët që kanë punuar në këtë manual.
“Më lejoni t’iu uroj për punën dhe angazhimin që keni treguar për hartimin e këtij manuali mjaft të rëndësishëm.
Promovimi i sotëm i manualit të dytë për procedurat standarde operative: Infermieria në kujdesin parësor shëndetësor paraqet një ngjarje të rëndësishme që lidhet me planet zhvillimore e ku infermierët pa dyshim se janë pjesë përbërëse e këtyre planeve”, ka thënë Nexhmije Gori, kryetare e OIK.
Sipas saj, infermierët, posaçërisht në nivelin primar shëndetësor janë kontakti i parë me pacientin. “Andaj këto manuale që po krijohen me qëllim të standardizimit të procedurave paraqesin një ndihmesë jo vetëm për anëtarësinë tonë.
Përmes procedurave standarde do të përfitojnë posaçërisht pacientët, duke marrë shërbime të njejta në nivel të njejtë shëndetësor”, ka thënë kryetarja Gori.
Sipas saj, kështu vihet në pah elementi i barazisë që një nga elementet kryesore etike për infermierinë.
“OIK është dhe do të jetë e gatshme gjithnjë që të mbështesë zhvillimin strategjik shëndetësor dhe sa herë që kërkohet ne jemi afër Jush që këto dokumente të rëndësishme të implementohen në praktikë.
Pa dashur që fjaimi im të stërzgjatet, ju uroj për angazhimin dhe shfrytëzoj nga rasti t’iu rikonfirmoj se OIK është dhe do mbetet e hapur për secilën kërkesë në favor të komunitetit”, ka thënë Gori.
Në takim kanë marrë pjesë edhe ministri i shëndetësisë Arben Vitija dhe përfaqësues të Departamentit të Infermierisë të Ministrisë së Shëndetësisë që edhe kanë punuar në hartimin e manualit.
