OIK ka mbajtur sesionin vjeshtor të EVP-së në Regjionin e Pejës
Pejë, 30 nëntor –
Në vazhdën e angazhimeve të saj për Edukimin e Vazhdueshëm Profesional (EVP), Oda e Infermierëve, Mamive dhe Profesionistëve të tjerë Shëndetësorë të Kosovës (OIK) në Hotel Dukagjini në Pejë, ka mbajtur sesionin për infermierët dukagjinas.
Të gjithë anëtarët e këtij regjioni përfituan nga mundësia për të ndjekur trajnimet pa pagesë, duke e bërë pjesëmarrjen jashtëzakonisht të lartë dhe mbështetjen të dukshme për këtë nismë.
Në këtë aktivitet në emër të OIK prezantuan Zv. Kryetari z. Xhemajl Dugolli, zëvendëskryetarja Leonora Bakija dhe ish-Kryetari i OIK, z. Naser Rrustemaj, të cilët theksuan rëndësinë e përpjekjeve për avancimin profesional të infermierëve në çdo regjion të Kosovës.
Në kuadër të këtij sesioni, pjesëmarrësit patën mundësinë të thellojnë njohuritë në tema kyçe për profesionin dhe përmbushjen e standardeve të larta profesionale, përfshirë:
- Legjislacioni, Etika dhe Standardet Profesionale – një diskutim i detajuar mbi rëndësinë e njohjes së kuadrit ligjor dhe zbatimin e standardeve profesionale në çdo aspekt të praktikës.
- Komunikimi dhe Bashkëpunimi Ndërdisiplinor – me theks në nevojën e një komunikimi të qartë dhe bashkëpunimi të ngushtë ndërmjet profesionistëve shëndetësorë për përmirësimin e cilësisë së shërbimeve dhe kujdesit të pacientit.
- Mbingarkesa në Punë dhe Menaxhimi i Shëndetit dhe Sigurisë – trajtesë mbi teknikat për menaxhimin e stresit dhe krijimin e kushteve të sigurta në punë për mbrojtjen e shëndetit mendor dhe fizik të profesionistëve shëndetësorë.
Ky sesion, pasqyron dedikimin e OIK-ut për të mbështetur zhvillimin e vazhdueshëm të anëtarëve të saj në të gjitha regjionet e vendit.
