Në fillim të vitit 2020, bota u zgjua nga një sëmundje e re e shkaktuar nga një mutacion i koronavirusit (Covid 19) dhe Organizata Botërore e Shëndetësisë e shpalli atë një emergjencë të shëndetit publik me shqetësim ndërkombëtar. Për koiçidencë kjo korrespondoi me dyqind vjetorin e lindjes së Florence Nightingale dhe prandaj u quajt dhe viti i infermierëve.

Është kjo pandemi që po sfidohet nga infermierët edhe pse kushtet nuk janë në favorin e tyre. Sfidat janë nga më të ndryshmet: fiziologjike, emocionale dhe të sigurisë në punë.

• Fiziologjike: shumë personel shëndetësor u prekën nga kjo sëmundje dhe shumë prej tyre nuk mundën të fitojnë betejen kundër virusit.
• Emocionale: stresi i shkaktuar qoftë nga mungesa e informacionit, apo nga vdekjet e shumta të njerëzve dhe personelit. Shpesherë dhe ndarja nga familja për arsye sigurie për familjarët.
• Siguria në punë: Sistemet shëndetësore nuk ishin në gjendje të siguronin pajisje mbrojtëse si dorëza e maska, ku institucionet shëndetësore u gjendën përballë pamundësisë për të plotësuar vendet e punës me personel dhe infermierët ishin të detyruar të punonin me orare të zgjatura.

Por u desh të ndodhte kjo pandemi që bota të kuptonte se sa të rëndësishëm janë infermierët në funksionalizimin e shërbimeve shëndetësore. Ata kanë qenë gjithnjë të ekspozuar ndaj rreziqeve që vijnë nga detyra e tyre. Dhe këto diskutime shfaqen gjithmonë në momente kritike dhe pse duhen të jetë një diskutim i përhershëm.

Nuk duhet të harrojmë që ana financiare i bën shpesh infermierët të punojnë punë të dyta apo të bëjnë turne më shumë se sa është normale. Megjithatë nuk janë superheronj.

Roli kryesor i infermierëve në trajtimin dhe përmbajtjen e rasteve Covid-19 u njoh nga Organizata Botërore e Shëndetësisë. Dokumenti thekson sfidat dhe rëndësinë e fuqisë punëtore infermierore në të gjithë botën. Infermierët janë në ballë të menaxhimit të çështjeve Covid-19 dhe po përballen me sfida serioze për të përmirësuar kushtet e tyre të punës dhe për t'a njohur rëndësinë e sigurisë së tyre personale. Dhe jo pa qëllim kongresi ynë titullohet “Roli, rëndësia dhe sfidat e Infermierëve, Mamive dhe Profesionistëve tjerë Shëndetësor përgjatë periudhës së pandemisë Covid-19” Prandaj kërkoj nga ju që të bëheni pjesë e këtij eventi të madh që mbledh profesionistë nga mbarë Ballkani, Turqia dhe jo vetëm për të paraqitur punimet tuaja që të kemi mundësi të shkëmbejmë eksperiencat, të mësojmë nga njëri-tjetri dhe mbi të gjitha të nxjerrim perfundime se ku dhe si duhet të kërkojmë që të ngremë figurën e infermierit në pozicionin e merituar!

Faleminderit dhe mirë u takofshim në këtë kongres!

Presidenti i Kongresit

Naser Rrustemaj