Fjala e kryetares së OIK Nexhmije Gori në hapjen e Kongresit të II-të Ndërkombëtar
Të nderuar të pranishëm, fort të nderuar infermierë, mami dhe profesionistë tjerë shëndetësorë, përfaqësues universitetesh, media dhe kolegë nga Kosova, rajoni dhe bota.
Kam nderin e veçantë të shpalli të hapur Kongresin e dytë ndërkombëtar të OIK me temë: “Roli, rëndësia dhe sfidat në avancimin e praktikave profesionale të profesionistëve shëndetësorë”.
Shteti ynë, më i riu në Evropë ka punuar shumë në procesin e formimit të Odave të Profesionistëve Shëndetësorë, si organizata të pavarura.
Pavarësisht sfidave, pavarësia profesionale dhe aktiviteti rregullativ ka bërë që të gjitha problemet që kanë preokupuar komunitetin infermieror me vite, të adresohen dhe të gjejnë zgjidhje ligjore, të pranueshme dhe të balancuar, në interes të profesionistëve shëndetësorë, me standarde, cilësi dhe gjithmonë duke pasur në qendër të vëmendjes pacientin.
Është kënaqësi e veçantë që të përfaqësoj një komunitet të devotshëm, të përkushtuar dhe profesional, me etikë dhe integritet të lartë dhe gjithmonë në përputhje me Betimin e zotuar.
Të nderuar të pranishëm,
OIK si të gjitha odat e tjera, paraqesin një ndër reformat më të thella në sistemin shëndetësor të Kosovës dhe shoqërinë kosovare në përgjithësi.
Jemi shumë mirënjohës, Qeverisë së Republikës së Kosovës, që ka besuar tek ne dhe ka bartur të gjitha kompetencat publike për zhvillim dhe avancim profesional.
Me këtë fakt, ne si organizata profesionale jemi shndërruar në shtëpinë e dytë për komunitetin, i cili me përgjegjësi dhe angazhimin e vet e ka arsyetuar besimin e dhënë dhe ka zgjedhur të gjitha problemet duke pasur parasysh standardet profesionale.
Oda e Inermierëve, mamive dhe profesionistëve tjerë shëndetësorë ka numrin më të madh të anëtarëve, mbi 70% të komunitetit shëndetësor të Kosovës.
Angazhimet tona janë fokusuar në rishikim të rregullativës dhe harmonizimit të saj me standardet evropiane, sendërtimit të misionit të Odës dhe demokracisë së brendshme.
Prezenca e ekspertëve eminent të fushave të ndryshme, janë garancë e këtij kongresi, me këtë pjesëmarrje prestigjioze, në arritje të standardeve më të larta evropiane në avancimin e praktikave profesionale.
Edukimi i vazhdueshëm profesional dhe lidhja e komunitetit infermieror përmes aktiviteteve dhe organizimeve me karakter shkencor, është një nga prioritetet e Odës së Infermierëve, mamive dhe profesionistëve tjerë shëndetësor.
Duke qenë zëri i kontribuesve kryesor në përmirësimin e shëndetit dhe kualitetit të jetës së mijëra qytetarëve të vendit, ne si OIK kemi organizuar këtë Kongresin me qëllim të të forcimit të rolit dhe bashkëpunimit të profesionistëve të kujdesit shëndetësor.
Më shumë se kurrë, do të fokusohemi në një ndër hapat kryesorë në përmirësimin e cilësisë në zhvillimin e komunitetit duke u bazuar në obligimet ligjore por edhe për të përcjellë zhvillimin dhe trendet e fundit që na mundëson shkenca dhe teknologjia.
Një detyrë mjaft e rëndësishme që po punojmë parreshtur është lobimi i vazhdueshëm në të gjitha instancat drejt anëtarësimit në organizata ndërkombëtare. Ne do të këmbëngulim që brenda afeteve sa më të shkurtëra OIK të jetë anëtare e EFN dhe ISN duke e barazuar për nga kompetenca dhe rëndësia secilin infermier kosovar me ata të vendeve të rajonit, Evropës por edhe botës.
Të dashur të pranishëm, në fund iu them se ka diçka shumë të rëndësishme që na bën të zhvillohemi si profesionistë. Ajo është besimi dhe mbështetja tek njëri-tjetri, misioni profesional me dekada, në shërbim të rritjes së mundësive dhe zhvillimit profesional e shkencor.
Ju falëmnderit dhe shumë suksese Kongresit dhe gjithë pjesmarrësve!
