KOMUNIKATË PËR MEDIA
Oda e Infermierëve, Mamive dhe Profesionisteve tjerë shëndetësorë të Kosovës (OIK) shfrytëzon rastin që të përsëritë qëndrimin lidhur me çështjen e ngritjes së pagave dhe miratimin e ligjit për pagat e funksionarëve publik dhe shprehim përkrahjen tonë të plotë për realizimin e kërkesave të Infermierëve, Mamive dhe Profesionistëve tjerë shëndetësor të cilët përmes organizimit sindikal kanë paralajmëruar mbajtjen e grevës për realizimin e kërkesave të tyre të ligjshme.
Funksionimi i sistemit shëndetësor është i ndërlidhur nga shumë profesione, mirëpo një ndër profesionet që ka një rolë shumë të rëndësishëm në këtë sistem është edhe roli i Infermierëve Mamive dhe Profesionisteve të tjerë shëndetësorë, e që ndërlidhen me ushtrimin e veprimtarisë shëndetësore dhe janë ndër faktorët kyçë që ky sistem të funksionojë në ofrimin e shërbimeve sa me cilësore për popullatën.
Në mungesë të një reflektimi nga Qeveria dhe Parlamenti, ne si Odë e Infermierëve të Kosovës (OIK) vlerësojmë se hartimi i ligjit pa përfaqësim nga ky komunitet ka sjellë këto pakënaqësi dhe ndasi kaq të mëdha, ndonëse ky komunitet përfaqëson mbi 70% të profesionistëve shëndetësorë në Kosovë, pa punën e të cilëve nuk mund të paramendohet ofrimi i shërbimeve shëndetësore.
Në draftin e ri të Ligjit për pagat kërkojmë nga Ligjvënësit dhe Qeveria që të merret parasysh edhe përgatitja shkollore ashtu siç ka kërkuar OIK pasi që, si infermierët, psikologët e po ashtu edhe fizioterapeutët e kanë periudhën e njëjtë të shkollimit (Bachelor, 3 vjet studimi). Andaj edhe duhet të ketë trajtimi të barabartë dhe nuk duhet nënvlerësuar shkollimin.
OIK konsideron se të gjitha palët e përfshira në hartimin e këtij ligji duhet të veprojnë mbi bazën e arsyes. Kjo arsye duhet t’i ketë parasysh edhe komunitetin Infermieror duke e trajtuar këtë komunitet si një nga sektorët vital të shoqërisë. Gjithashtu nuk duhet neglizhuar fakti që, kushtet gjithnjë e më të pafavorshme për këtë komuniteti në Kosovë, po nxitin shumë nga ta që ta braktisin Kosovën dhe të kërkojnë punë në vendet e Bashkimit Evropian.
U bëjmë thirrje të gjithë Deputetëve të Parlamentit të Republikës së Kosovës, Kryeparlamentarit, Kryeministrit dhe Ministrit të Shëndetësisë, që para se të vendosin për miratimin e këtij ligji, ti kenë parasysh kërkesat e dala nga OIK si dhe punën dhe angazhimin që ky komunitet ofron për popullatë.
OIK do të jetë në mbështetje të plotë për të gjitha kërkesat që dalin nga anëtarësia e saj.
Prishtinë, 26 Janar 2019
