ODA E INFERMIERËVE INTENSIFIKON BASHKËPUNIMIN ME MAQEDONINË
Oda e Infermierëve, Mamive dhe profesionistëve të tjerë shëndetësorë të Kosovës ka nënshkruar marrëveshje bashkëpunimi me Shoqatën e infermierëve, teknikëve, obstetërve dhe infermierëve dentarë të Maqedonisë së Veriut. Po ashtu, në këtë shtet, OIK ka nënshkruar marrëveshje edhe me Shoqatën e Motrave, Teknikëve, Mamive dhe laborantëve shqiptarë
Oda e Infermierëve të Kosovës ka intensifikuar bashkëpunimin me Shoqatat simotra në Maqedoninë e Veriut. Së fundi, kjo është zyrtarizuar në një memorandum bashkëpunimi që është nënshkruar nga Kryetari i Odës së Infermierëve, Mamive dhe profesionistëve të tjerë shëndetësorë të Kosovës Naser Rrustemaj si dhe Gordanka Besliovska, Presidente e Shoqatës së infermierëve, teknikëve, obstetërve dhe infermierëve dentarë të Maqedonisë së Veriut.
Memorandumi ka për qëllim që të zbatohen me sukses iniciativat e përbashkëta dhe të shfrytëzohen kapacitetet dhe ekspertizat në realizimin e projekteve të përbashkëta.
“Ky bashkëpunim do të ofrojë zhvillim cilësor të kapaciteteve të profesionistëve të shëndetësisë me arsimim të mesëm, terciar dhe të lartë përmes përmirësimit cilësor të njohurive dhe aftësive siaps standardeve të fundit botërore; një qasje më e mirë dhe më humane për ofrimin e kujdesit shëndetësor dhe kujdesit për pacientët, veçanërisht gratë shtatzëna, nënat, të porsalindurit dhe foshnjat e parakohshme, fëmijët dhe familjet e tyre”, thuhet në memorandumin e nënshkruar ndërmjet kryetarit të OIK-ut, Naser Rrustemajt dhe homologes së tij nga Maqedonia e Veriut, Gordanka Besliovska.
Rrustemaj, ka thënë se memorandumi është bërë me qëllim të një angazhimi sa më të mirë, për të krijuar kushte për kujdes më të mirë, mirëqenie dhe trajtim të pacientëve përmes zhvillimit të infermierisë, mamisë dhe aktiviteteve të tjera të ngjajshme.
Sipas kryetarit të OIK, Naser Rrustemajt, po ashtu pjesë e memorandumit janë edhe bashkëpunimi me profesionistë dhe përfaqësuesit e kujdesit shëndetësor si dhe do të mundësojë veprime sistematike dhe përmirësim të cilësisë të kujdesit të përgjithshëm të pacientëve. “Aktivitetet e implementuara do të ofrojnë mbështetje të cilësisë më të mirë, parandalim dhe edukim të pacientëve, gjë që do të çojë në përmirësimin e shëndetit të përgjithshëm të popullatës”.
Po ashtu, një marrëveshje bashkëpunimi, OIK ka nënshkruar edhe me Shoqatën e Motrave, Teknikëve, Mamive dhe Laborantëve Shqiptarë në Maqedoninë Veriore. Marrëveshja është nënshkruar ndërmjet kryetarit Naser Rustemaj dhe përfaqësueses së infermierisë shqiptare në Maqedoninë e Veriut, Naxhije Fetai.
Qëllimi i kësaj marrëveshjeje është të inkurajojë shkëmbimin e përvojave ndërmjet OIK dhe shoqatës shqiptare të infermierisë në Maqedoni.
“Bashkëpunimi ndërmjet dy institucioneve përkatëse duhet të promovojë aktivitetet e mëposhtme, përfshirë shkëmbimet e ndërsjella dhe bashkëpunimet në avancimin profesional të infermierëve dhe profileve të tjera teknike; shkëmbimin e përvojave në funksionimin e shoqatave të infermierëve dhe mamive të Kosovës dhe Maqedonisë si dhe në standardizimin dhe unifikimin e profileve të infermierisë, kompetencave profesionale dhe unifikimit të thirrjeve”, thuhet ndër të tjera në marrëveshjen dy palëshe.
