Oda e infermierëve promovoi botimin e numrit të parë të revistës “Shëndeti dhe Kujdesi Infermieror”
Oda e infermierëve, mamive dhe profesionistëve tjerë shëndetësorë ka promovuar revistën “Shëndeti dhe kujdesi infermieror”, numri i parë i së cilës është botuar më 28 nëntor të këtij viti
Prishtinë, 4 dhjetor –
Kryetarja e OIK, Nexhmije Gori është shprehur shumë e lumtur që Revista “Shëndeti dhe Kujdesi Infermieror” do të jetë një dokumentim i ngjarjeve për infermierët dhe hulumtimet në infermieri.
“Jam shumë e lumtur që infermierët tashmë kanë një dritare ku mund të shfaqin angazhimin dhe promovojnë punën e tyre të rëndë dhe me shumë sfida. Siç po e shihni nga Ballina, ne në qendrën e revistës kemi vënë një infermiere. Nesër aty do të jetë një infermiere tjetër dhe kështu ky ritëm do të vazhdojë për sa të jetë Oda e Infermierëve, mamive dhe profesionistëve tjerë shëndetësorë”, ka thënë kryetarja Gori.
Ajo tha se që nga marrja e mandatit i ka kushtuar rëndësi të posaçme krijimit të komisionit për veprimtari botuese.
Revista “Shëndeti dhe Kujdesi Infermieror”, sipas Gorit do të shkruajë për ngjarje dhe histori të infermierëve, mamive dhe profesionistëve tjerë shëndetësorë, do të shkruajë për shkencë dhe do të zhvillojmë edhe më tej veprimtarinë botuese dhe shkencore.
Ministri i shëndetësisë Arben Vitija po ashtu ka folur për rolin dhe rëndësinë e infermierëve në sistemin shëndetësor si dhe ka përgëzuar OIK për revistën dhe numrin e saj të parë.
Ai ka thënë se infermierët kanë rol të jashtëzakonshëm në sistemin shëndetësor të Kosovës.
Drejtori i ShSKUK-së Elvir Azizi po ashtu ka përshëndetur të pranishmit dhe ka shprehur gatishmërinë e tij për çfarëdo lloj bashkëpunimi me OIK.
Edhe kryetari i Odës së Farmacistëve Kadri Bytyqi ka uruar për botimin e revistës së OIK, Shëndeti dhe Kujdesi Infermieror.
Kryetari i Komisionit për Veprimtari Botuese dhe Kryeredaktori i revistës së OIK, Muharrem Arifi ka thënë se profili i revistës “Shëndeti dhe Kujdesi Infermieror”, është informativ dhe shkencor.
“Kemi menduar kështu në mënyrë që lexuesve tanë t’iu ofrojmë sa më shumë informacione për punën dhe aktivitetet e OIK dhe njëherit t’iu japim mundësinë secilit profesioonist shëndetësor dhe më gjerë që në hapësirat e kësaj reviste të publikojnë punimet e tyre shkencore, duke treguar punën e palodhshme dhe sakrificat e komunitetit, infermierë, mami dhe profesionistë tjerë shëndetësorë, për punën e tyre humane të cilen e ofrojnë për çdo ditë karshi pacientëve në mënyrë që shërbimet mjekësore të jenë sa më cilësore”, ka thënë Arifi.
Ndërkohë, për rolin dhe rëndësinë e Odave të profesionistëve shëndetësor ka folur profesori Hysni Bajrami.
Ai ka treguar se si janë organizuar Odat e Profesionistëve Shëndetësorë duke qenë një shembull shumë i mirë i profesionalizmit dhe bartjes së kompetencave tek profesionistët.
