OIK fillon sesionin vjeshtor të edukimit të profesional
Oda e Infermierëve, Mamive dhe Profesionistëve tjerë Shëndetësorë të Kosovës (OIK) në kuadër të sesionit vjeshtor ka filluar Edukimin e Vazhdueshëm Profesional (EVP) pa pagesë për të gjithë anëtarët e saj, qofshin ata të punësuar në sektorin publik, në sektorin privat apo edhe të pa punë.
Prishtinë 26 tetor –
Oda e Infermierëve, Mamive dhe Profesionistëve tjerë Shëndetësorë të Kosovës (OIK) ka filluar në regjionin e Prishtinës sesionin vjeshtor të Edukimit të Vazhdueshëm Profesional (EVP).
Janë tri tema që janë diskutuar në kuadër të EVP:
- Legjislacioni, Etika dhe Standardet Profesionale ku potencohet rëndësia e kuadrit ligjor, çështjeve etike, dhe mbajtjes së standardeve profesionale në praktikën e përditshme.
- Ndikimi i Komunikimit dhe Bashkëpunimi, duke potencuar rëndësinë e komunikimit të qartë dhe bashkëpunimit ndërdisiplinor në mes të profesionistëve për përmirësimin e cilësisë së kujdesit shëndetësorë si dhe
- Mbingarkesa në Punë dhe Menaxhimi i Shëndetit dhe Sigurisë që ka në fokus menaxhimin e stresit, mbrojtjen e shëndetit mendor dhe sigurinë në vendin e punës për profesionistët shëndetësorë.
Kryetarja e Odës së Infermierëve, Mamive dhe Profesionistëve tjerë Shëndetësorë të Kosovës, Nexhmije Gori, ka thënë se Edukimi i vazhdueshëm profesional si një prej komponentëve thelbësor për zhvillimin e karrierës synon edhe përmirësimin e cilësisë së shërbimeve shëndetësore në Kosovë.
“Më shumë se një detyrë; EVP është një mundësi për të rritur njohuritë tona, për të përmirësuar aftësitë tona dhe për t’u përgatitur për sfidat e reja që na presin në fushën e shëndetësisë. Në një kohë kur kërkesat për shërbime shëndetësore po rriten, është e domosdoshme të jemi gjithmonë të përgatitur dhe të informuar për metodat dhe praktikat më të reja mjekësore”, ka thënë kryetarja Gori.
Andaj, EVP që po organizon OIK, sipas kryetares Gori krijon mundësi për të gjithë anëtarët që të avancojnë njohuritë dhe aftësitë e tyre.
Profesor Hysni Bajrami, këshilltar ligjor i kryetares së OIK, gjatë diskutimit në kuadër të EVP ka ngritur çështje shumë të rëndësishme që janë edhe prioritete të OIK-ut.
Profesor Bajrami ka folur për aspektet legjislative që kanë një rëndësi të veçantë për ngritjen e transparencës dhe llogaridhënies.
Po ashtu, ai ka vlerësuar si imediate lidhjen e drejtpërdrejt të trupit elektoral me njësitë zgjedhore si dhe përfaqësuesit e zgjedhur si dhe ka diskutuar edhe për procedurat për inicimin e përgjegjësive të organeve të zgjedhura.
Një temë tjetër po aq e rëndësishme e ngritur nga profesor Bajrami është çështja e respektimit të të drejtave të njeriut dhe të drejtave të pacientit, të drejta këto të përcaktuara me Ligjin për të drejtat dhe përgjegjësitë e qytetarëve në sistemin shëndetësor.
Edukimi i Vazhdueshëm Profesional, përveç në Prishtinë, do të mbahet edhe në regjionin e Pejës, Gjakovës, Prizrenit, Mitrovicës, Ferizajit, Gjilanit, Podujevës dhe Vushtrrisë me pjesëmarrje fizike dhe pa pagesë për të gjithë anëtarët e OIK.
