OIK ndau mirënjohje për infermierët që kontribuan gjatë pandemisë
Oda e Infermierëve, Mamive dhe Profesionistëve tjerë shëndetësorë ka ndarë mirënjohje për infermierët e institucioneve primare, sekondare dhe terciare mjekësore në Kosovë që kanë ofruar shërbime shëndetësore për pacientët e infektuar me Covid 19
Prishtinë, 6 korrik – Oda e Infermierëve, Mamive dhe Profesionistëve tjerë shëndetësorë ka ndarë mirënjohje për infiermierët e gjitha institucioneve shëndetësore që kanë dhënë kontribut në parandalimin e përhapjes së pandemisë dhe trajtimin e pacientëve me Covid 19.
Naser Rrustemaj, Kryetar i Odës së Infermierëve, Mamive dhe Profesionistëve tjerë shëndetësorë, në ceremoninë e ndarjes së mirënjohjeve, ka falënderuar gjithë infermierët kosovarë që gjatë gjithë pandemisë janë angazhuar në shërbim të pacientëve me Covid 19.
“Ju keni rrezikuar shëndetin tuaj dhe të familjeve tuaja duke u shërbyer pacientëve me Covid 19. Kjo ishte një sfidë, ku ju të gjithë dolët faqebardhë”, ka thënë Rrustemaj.
Mirënjohjet në emër të gjitha institucioneve që kanë punuar me pacientë me Covid 19, përfshirë institucionet primare, sekondare dhe terciare mjekësore, i kanë pranuar kryeinfermierët e këtyre institucioneve.
Sabrije Ramabaja, kryeinfermiere në Klinikën e Gjinekologjisë, ka thënë se kjo mirënjohje iu bën nder komunitetit infermieror dhe stafit të profesionistëve tjerë shëndetësorë që kanë bërë një sakrificë dhe mund të madh gjatë gjithë pandemisë.
“Shpresojmë që kjo punë dhe angazhim të mos përsëritet dhe të mos harrohet mundi dhe sakrifica e gjithsecilit infermier që ka punuar gjatë pandemisë”, ka thënë Ramabaja.
Ndarja e çmimeve në emër të OIK është bërë nga kryetari i OIK, Naser Rrustemaj, zëvendëskryetare e OIK-ut, Lirije Beqiri dhe Muharrem Arifi, kryetar i Këshillit Drejtues të OIK.
Gjatë pandemisë Covid 19, kanë vdekur 11 infermierë dhe mbi 2500 ishin të prekur me Covid 19.
