OIK organizon Kongresin Ndërkombëtar Infermieror
Oda e Infermierëve, Mamive dhe profesionistëve tjerë shëndetësorë (OIK) organizon Kongresin e parë ndërkombëtar të infermierëve, mamive dhe profesionistëve tjerë të Ballkanit, që do të mbahet në Prishtinë më 06 dhe 07 maj 2021.
Kongresi organizohet në bashkëpunim me Odat, Universitetet dhe Shoqatat e Infermierëve nga Shqipëria, Maqedonia Veriore, Sllovenia, Kroacia dhe Turqia. Kongresi i I-rë Ndërkombëtar i Infermierëve, Mamive dhe Profesionistëve të tjerë të Shëndetit të Ballkanit – KNIPShB është një kongres profesional ndërkombëtar që mbulon rolin, rëndësinë dhe sfidat e infermierëve, mamive dhe profesionistëve të tjerë të shëndetit gjatë periudhës pandemike Covid-19, dhe sfida të tjera me interes për profesionistët shëndetësor.
Derisa bota është përqendruar në pandeminë COVID-19, roli i infermierëve, mamive dhe profesionistëve të tjerë shëndetësorë në këtë kohë duhet vlerësuar shumë duke pasur parasysh sfidat e shumta në të cilat po kalojnë komuniteti infermieror. Andaj, infermierët janë në qendër të përpjekjeve për të parandaluar dhe menaxhuar pandeminë COVID-19 me kontributin e tyre jetësor në betejën për shëndetin dhe mirëqenien e popullatës në të gjithë botën, prandaj ky kongres do të trajtojë çështje me interes për rolin e tyre.
Në këtë kongres, tashmë janë hapur thirrjet që të paraqiten punime të plota apo abstrakte në gjuhën angleze nga gjithë pjestarët e komunitetit infermieror, përgjatë gjithë rajonit. Punimet duhet të jenë origjinale dhe nuk duhet të jenë botuar më parë. Kongresi do të organizohet në platformën online Zoom dhe afati i fundit për aplikim për prezantim në Kongres është 20 prilli i këtij viti.
Të gjithë pjesmarrësit e këtij kongresi do të përfitojnë nga 20 pikë për pjesmarrje me prezantim, dhe 15 pikë për pjesmarrje, të vlefshme për procesin e ri-licencimit, pasë parasysh faktin se ky kongres është akredituar nga Këshilli për Edukim të Vazhdueshëm Profesional i OIK-ut. Ky është linku i Kongresit të parë ndërkombëtar të infermierëve, mamive dhe profesionistëve tjerë të Ballkanit: https://oik-ks.org/congress
