U mbajt Kuvendi i shtatë i OIK
Në Kuvendin e shtatë të OIK janë aprovuar rregullorja për zgjedhjet e organeve të odës, vendimi për kryesinë e Komisionit Qendror Zgjedhor dhe u vendos që data e zgjedhjeve në OIK të jetë 10 shkurti i vitit 2023
Prishtinë, 16 nëntor –
Oda e Infermierëve, mamive dhe profesionistëve tjerë shëndetësorë ka mbajtur Kuvendin e shtatë të OIK ku ka aprovuar rregulloren për zgjedhjet e organeve të odës.
Naser Rrustemaj, kryetar i OIK, me rastin e hapjes së Kuvendit, tha se periudha e kaluar 4 vjeçare ka qenë periudhë me shumë sfida dhe me rezultate të arritura në të gjitha fushat e përgjegjësive të Odës.
“Edhe në rrethanat e përballjes me pandeminë COVID-19 që ka kërkuar një qasje krejtësisht ndryshe nga ajo që është planifikuar kemi arritë që me punën e përbashkët t’i realizojmë të gjitha objektivat e parapara”, ka thënë Rrustemaj.
Ai ka thënë se digjitalizimi i shërbimeve dhe ofrimi i këtyre shërbimeve në mënyrë sa më të letë dhe më të afërt për anëtarët e OIK ka qenë një nga prioritetet e tija.
“Kam kënaqësinë të deklaroj se këtë synim e kemi arritur dhe sot përveç shërbimeve administrative edhe edukimi i vazhdueshëm profesional realizohen përmes platformës online që paraqet lehtësi të madhe për të gjithë anëtarët e OIK”.
Objektivë tjetër, Rrustemaj ka thënë se ishte bashkëpunimi me asociacionet ndërkombëtare me qëllim të avancimit të pozitës ndërkombëtare të OIK dhe bashkëpunimit me organizata në rajon dhe më gjerë.
Hap pozitiv, ishte ftesa në cilësinë e anëtarit vëzhgues në Federatën e Infermierëve dhe mamive të Evropës që është një hap drejt statusit të plotë dhe të barabartë për të qenë pjesë e këtij organizimi të infermierëve dhe mamive në Evropë.
Në Kuvendin e shtatë u miratua edhe vendimi për kryesinë e Komisionit Qendror Zgjedhor dhe u vendos që data e zgjedhjeve në OIK të jetë 10 shkurti i vitit 2023.
Po ashtu, në këtë Kuvend u aprovua edhe procesverbali i Kuvendit të gjashtë si dhe u prezantua raporti i punës për të arriturat dhe sfidat gjatë këtij mandati.
Rregullorja: KLIKO KËTU
Vendimi për formimin e KQZ: KLIKO KËTU
Vendimi për shpalljen e datës së zgjedhjeve: KLIKO KËTU
