Oda e Infermierëve kërkon shtimin e infermierëve
Oda e Infermierëve, Mamive dhe Profesionistëve tjerë shëndetësorë, pas analizimit të situatës me Covid 19, i ka bërë thirrje ministrit të shëndetësisë së Kosovës Armend Zemaj, që të rrisë urgjentisht numrin e infermierëve në institucionet shëndetësore
Prishtinë, 16 nëntor –
Oda e Infermierëve, Mamive dhe Profesionistëve tjerë shëndetësorë, i ka bërë thirrje ministrit të shëndetësisë së Kosovës Armend Zemaj, që të rrisë numrin e infermierëve, mamive dhe profesionistëve tjerë shëndetësorë në institucionet shëndetësore.
Kjo, pasi numri i stafit infermieror të punësuar në institucione është shumë më i vogël se kërkesat, për çka po rrezikohen edhe shërbimet shëndetësore, në kohën kur vendi po ballafaqohet me pandeminë Covid 19.
OIK, vlerëson se kjo është një kërkesë urgjente me të cilën duhet të merret Ministria e Shëndetësisë.
Shtimi i numrit të infermierëve duhet të bëhet në të gjitha nivelet e kujdesit shëndetësor në vend, përfshirë nivelin primar, sekondar dhe terciar mjekësor.
Rritja e numrit të infermierëve në institucionet shëndetësore ka qenë edhe kërkesë e Këshillit Nacional Këshillëdhënës të Odës së Infermierëve të Kosovës.
