Benefitet nga Anëtarësia në OIK
OIK-u, në vazhdën e përpjekjeve për përmirësimin e mbrojtjes profesionale, juridike, sociale dhe materiale të anëtarësisë, ka siguruar një pako përfitimesh për anëtarët aktivë, duke përfshirë mbrojtjen ligjore, sigurimin e jetës, EVP dhe benefite të tjera që dalin nga anëtarësia.
Çka përfitojnë anëtarët e OIK-ut?
Të gjithë anëtarët e OIK-ut të cilët kanë përmbushur obligimet e anëtarësisë përfitojnë nga pakoja e benefiteve të OIK-ut pa pagesë shtesë.
Mbrojtja Ligjore për anëtarët e OIK-ut
Pakoja e shërbimeve juridike ka për qëllim përfaqësimin dhe mbrojtjen e interesave profesionale dhe juridike të anëtarëve të OIK-ut në rastet kur të drejtat e tyre cenohen gjatë ushtrimit të profesionit, në marrëdhënien e punës apo në procedura të tjera që lidhen me statusin profesional të anëtarit.
Pakoja e shërbimeve juridike përfshin:
Përfshihen përfaqësimi dhe mbrojtja e interesave ligjore të Odës para gjykatave të të gjitha niveleve, prokurorive, organeve të administratës publike qendrore dhe lokale, organeve disiplinore dhe çdo autoriteti tjetër kompetent. Përfaqësimi përfshin ndërmarrjen e të gjitha veprimeve procedurale, ushtrimin dhe tërheqjen e mjeteve juridike të rregullta dhe të jashtëzakonshme, si dhe përfaqësimin në procedura të ndërmjetësimit, ujdi gjyqësore dhe jashtëgjyqësore.
Anëtarët e Odës përfaqësohen në rastet e ushtrimit të padive për dëmshpërblim për shkak të shkeljes së nderit, cenimit të dinjitetit dhe dëmtimit të integritetit profesional. Kjo përfshin përgatitjen e padive, përfaqësimin në procedura civile për kompensim të dëmit material dhe jomaterial, si dhe ndërmarrjen e çdo veprimi të nevojshëm për mbrojtjen efektive të reputacionit profesional të anëtarëve.
Përfshihen kontestet lidhur me ndërprerjen e kontratës së punës, procedurat disiplinore, mosrespektimin e të drejtave nga marrëdhënia e punës, mospagesën e pagës, diskriminimin dhe çdo shkelje tjetër të të drejtave të garantuara me legjislacionin e punës në fuqi.
Shërbimet juridike përfshijnë përfaqësimin në procedura administrative dhe gjyqësore që lidhen me fitimin e pensionit të pleqërisë, pensionit invalidor, pensionit familjar, njohjen e stazhit të punës dhe çdo kontest tjetër me autoritetet kompetente pensionale.
Ofruesi i shërbimeve përfaqëson anëtarët e Odës në kontestet që kanë të bëjnë me zbatimin e procedurave të konkurseve publike, duke përfshirë ankesat ndaj rezultateve të konkurseve, shkeljet procedurale në procesin e rekrutimit dhe kontestet administrative apo gjyqësore që rrjedhin nga këto procedura.
Anëtarët që dëshirojnë të përfitojnë nga mbrojtja ligjore duhet të drejtohen në Zyrën Ligjore të OIK-ut ose të dërgojnë kërkesën përmes emailit [email protected], duke bashkëngjitur provat dhe dëshmitë materiale lidhur me çështjen që dëshirojnë ta ngrisin.
Sigurimi i Jetës për anëtarët e OIK-ut
Sigurimi i jetës është benefit që mbulohet nga OIK-u për anëtarët e saj aktivë dhe nuk paraqet sigurim personal apo familjar shëndetësor. Mbulimi bëhet sipas kushteve të përcaktuara në policën e sigurimit.
Sigurimi i jetës përfshin:
- Vdekje për shkaqe aksidenti.
- Vdekje të shkaktuar nga sëmundjet profesionale.
- Vdekje natyrale si pasojë e sëmundjeve të ndryshme.
- Paaftësi apo invaliditet për shkak të aksidentit.
- Kompensim për sëmundje të rënda.
- Sëmundje onkologjike.
- Qëndrim në spital.
- Thyerje të kockave për shkak të aksidentit.
- Kirurgji kozmetike për shkak të pasojave të aksidentit.
Sëmundjet e rënda përfshijnë:
Tabela e mbulesave siguruese
| Nr. | Përshkrimi | Shuma siguruese |
|---|---|---|
| 1 | Vdekje nga aksidenti | 3,500 € |
| 2 | Invaliditet nga aksidenti | 1,500 € |
| 3 | Paaftësi nga lëndimi në punë | 3,000 € |
| 4 | Sëmundje onkologjike | 4,000 € |
| 5 | Vdekje nga sëmundje profesionale | 3,500 € |
| 6 | Vdekje natyrale deri në moshën 65 vjeçare | 1,000 € |
| 7 | Sëmundje të rënda nga pika V | 750 € |
| 8 | Qëndrim spitalor 7–14 ditë | 100 € |
| 9 | Qëndrim spitalor 15–21 ditë | 150 € |
| 10 | Qëndrim spitalor mbi 22 ditë | 200 € |
| 11 | Kirurgji kozmetike si pasojë e aksidentit | 250 € |
Si të bëheni përfitues?
Kyçuni në profilin tuaj në platformën online të OIK-ut dhe kontrolloni menynë “Pagesa e anëtarësisë”.
Anëtarët e papunë, të punësuarit në sektorin privat dhe pensionistët gjenerojnë faturën për një vit. Nëse ekziston borxh paraprak, ai i bashkëngjitet faturës.
Pyetësori gjendet në profilin e anëtarit në platformën online, në menynë “Benefitet e anëtarësisë”.
Vendimi për pagesën e anëtarësisë
Për të siguruar gjithëpërfshirje të anëtarëve në këto benefite, Kuvendi i OIK-ut ka përcaktuar mënyrën e pagesës së anëtarësisë si në vijim:
- Të punësuarit në sektorin publik paguajnë anëtarësinë në shumën prej 0.5% nga paga bruto përmes sistemit Payroll.
- Anëtarët e papunë dhe të punësuarit në sektorin privat paguajnë 3 euro në muaj.
- Anëtarët pensionistë paguajnë 2 euro në muaj.
- Pagesa për anëtarët e papunë, sektorin privat dhe pensionistët bëhet në baza vjetore.
Përditësimi i listave të përfituesve
Përfitues të skemës janë anëtarët të cilët kanë përmbushur obligimet ndaj OIK-ut dhe janë përfshirë në listën e përfituesve. Anëtarët që i kryejnë obligimet pas afatit të përcaktuar vendosen në listën e pritjes për plotësim.