Praktika Profesionale
Platforma për praktikën profesionale është krijuar nga Oda e Infermierëve, Mamive dhe Profesionistëve të tjerë Shëndetësor të Kosovës për të lehtësuar procesin e aplikimit, pajisjes me planprogram dhe librezë të praktikës profesionale.
Rreth praktikës profesionale
Praktika profesionale është proces i detyrueshëm për kandidatët me përgatitje të mesme dhe të lartë shkollore në profilet e përfaqësuara nga OIK, të cilët aplikojnë për pajisje me licencë pune për herë të parë. Qëllimi i praktikës është zhvillimi i aftësive praktike, teknike dhe etike, si dhe përgatitja e kandidatëve për ushtrimin e pavarur të profesionit.
Ky proces realizohet në përputhje me Rregulloren për Praktikën Profesionale të Profesionistëve Shëndetësor me Përgatitje të Mesme dhe të Lartë Shkollore.
Kush duhet të aplikojë?
Kandidatët që kanë përfunduar shkollimin në profilet e përfaqësuara nga OIK dhe aplikojnë për licencë pune për herë të parë.
Kohëzgjatja
Praktika profesionale zgjat 6 muaj dhe realizohet sipas planprogramit përkatës të profilit.
Dokumentet
Për aplikim kërkohet formulari elektronik, diploma e noterizuar dhe dokumenti identifikues. Për diplomat jashtë Kosovës kërkohet edhe nostrifikimi nga MASHTI.
Mënyra e aplikimit
Aplikimi bëhet vetëm përmes platformës elektronike praktika.oik-ks.org. Kandidati plotëson formularin online, ngarkon dokumentet e kërkuara dhe pas aplikimit pranon të dhënat për qasje në profilin e tij.
Përmes profilit, kandidati mund të ndjekë statusin e aplikimit, të pranojë njoftime nga OIK dhe, nëse kërkohet nga administrata, të përditësojë të dhënat ose dokumentet e ngarkuara.
Planprogramet e praktikës profesionale
Planprogrami përcakton institucionet ku zhvillohet praktika, kohëzgjatjen për secilën pjesë të praktikës dhe përmbajtjen profesionale që kandidati duhet të realizojë gjatë periudhës së praktikës.
Infermier/Mami dhe Pediatri, Bashkëpunëtor Profesional
Praktika realizohet në institucionet e kujdesit parësor, institucionet spitalore dhe repartet përkatëse sipas profilit.
Profilet Teknike Stomatologjike
Përfshin praktikën në njësitë e stomatologjisë, klinikat stomatologjike dhe ordinancat private të licencuara.
Teknik i Fizioterapisë
Praktika zhvillohet në institucionet e rehabilitimit, klinikat përkatëse dhe shërbimet e mjekësisë fizikale.
Teknik i Farmacisë
Përfshin praktikë në barnatore të licencuara, shërbime farmaceutike në QKMF dhe institucione spitalore.
Teknik i Radiologjisë me përgatitje të mesme
Praktika realizohet në institucione publike dhe private të licencuara për shërbime radiologjike.
Teknik Laborant
Përfshin praktikë në QKMF, QMF, AMF, laboratorë dhe institucione spitalore të licencuara në fushën përkatëse.
Teknik për Fitnes dhe Nutricion
Praktika përfshin edukimin shëndetësor, ushqyeshmërinë, aktivitetin fizik dhe institucionet përkatëse të shëndetit publik.
Teknik i Optikës
Praktika zhvillohet në institucione publike dhe private të licencuara për shërbime optike dhe oftalmologjike.
Pas aprovimit të aplikimit
Pas shqyrtimit dhe aprovimit nga OIK, kandidati pajiset me Librezën e Praktikës Profesionale dhe Planprogramin e Praktikës Profesionale sipas profilit përkatës. Libreza përmban numrin unik të praktikës dhe QR Code për verifikim.
Kontakt
Për informata shtesë lidhur me praktikën profesionale, aplikimin ose planprogramet, kontaktoni:
Email: [email protected]
Platforma: https://praktika.oik-ks.org