OIK përmbyll projektin për të drejtat e njeriut, trajnon 3580 infermierë
Prishtinë
12.01.2022
OIK ka përmbyllur me sukses projektin e realizuar gjatë vitit 2021, projekt i mbështetur nga CDF me temë: Të drejtat themelore të njeriut, me ç’rast organizuan tryezë të rrumbullakët në të cilën morën pjesë: Përfaqësues nga Ministria e Shëndetësisë, Ministria e Arsimit, Fakulteti i Mjekësisë – Departamenti i Infermierisë, Përfaqësues nga Institucioni i Avokatit të Popullit dhe të ftuar nga institucionet shëndetësore, Drejtor të Infermierisë së Spitaleve Regjionale dhe Kryeinfermierë të Qendrave Kryesore të Mjekësisë Familjare nga të gjitha komunat e Kosovës.
Qëllimi i këtij aktiviteti ishte diskutimi përmbledhës i aktiviteteve të organizuara gjatë vitit 2021, aktivitete këto të cilat trajtuan tema me rëndësi në aspektin e të drejtave dhe lirive themelore të njeriut, me theks të veçantë të drejtave të Infermierëve, mamive dhe profesionistëve tjerë shëndetësor në vendin e tyre të punës.
Kryetari i OIK-ut, z. Naser Rrustemaj falënderoi Fondin për Zhvillim të Komuniteteve në Kosovë (CDF) për mbështetjen që i ofroi OIK-ut që të organizojë dhe zhvilloj me sukses këto trajnime në kuader të Edukimit të Vazhdueshëm Profesional.
Ai premtoi se edhe në të ardhmen nuk do të mungoj angazhimi që OIK në bashkëpunim me institucionet qeveritare dhe joqeveritare të vazhdojë bashkëpunimin në ngritjen e kapaciteteve të komunitetit infermieror.
Udhëheqesi i projektit, Muharrem Arifi para të pranishmëve prezantoi rezultatet e arritura gjatë zhvillimit të projektit, ku ndër të tjera theksoi se nga ky projekt u trajnuan 3580 infermierë duke përfituar njohuri mbi të drejtat themelore të njeriut si dhe pikë te nevojshme për rilicencim.
OIK njofton të gjithë anëtarët e saj se aktivitetet për EVP do të vazhdojnë edhe gjatë vitit 2022.
