OIK planifikon një kongres ndërkombëtar online
Prishtinë, 5 mars – Oda e Infermierëve, mamive dhe profesionistëve tjerë shëndetësorë të Kosovës ka organizuar një takim online me asociacionet, odat dhe shoqatat simotra rajonale si dhe ato nga Turqia, ku është diskutuar për rolin e infermierëve gjatë pandemisë “Covid 19”.
Në këtë takim, është thënë se infermierët kanë luajtur rol të pazëvendësueshëm gjatë pandemisë, duke qenë në luftë me virusin Covid 19, pavarësisht rreziqeve që u janë kanosur jetëve të vet profesionistëve shëndetësorë.
Naser Rrustemaj, kryetar i OIK ka njoftuar homologët rajonalë për angazhimet e OIK-ut për të qenë sa më afër anëtarësisë së saj derisa vendi është ballafaquar me pandeminë.
Ai ka njoftuar për gjendjen në Kosovë sa i përket Covidit, hapat që janë ndërmarrë për mbrojtje shëndetësore dhe ka folur edhe për rolin dhe sakrificën e infermierëve kosovarë.
Rrustemaj, po ashtu, ka propozuar para kolegëve nga rajoni që në fillim të muajit maj, të mbahet një kongres ndërkombëtar nga distanca, ku pos vendeve të Ballkanit do të marrin pjesë edhe përfaqësuesit e odave infermierore nga Turqia.
Për këtë është arritur pajtueshmëri e plotë edhe nga përfaqësuesit e organizatave tjera infermierore nga vendet e Ballkanit, por edhe ata nga Turqia.
